[أحمد فؤاد نجم]

مرحبا

 

بعد السلام والمرحبا

يا اولاد بلدنا يا طيبين

نفرش كلام المصطبة

واضح لكل السامعين

مصر الحبيبة الطيبة

أم البنية (بتشديد الياء) والبنين

ايش حالها في عز الصبا

ايش حال ولادها المخلصين

وسط العواصف مركبة (سفينة)

بين ريح شمال وريح يمين

جابوا الطبيب ابن الحلال

كشف مكان الداء وشاف وقال

أهل البصيرة في البلد

جواب لكل السائلين

قال البلد عاوزه ولد

ياخد بطار (ثأر) المظلومين

ولد يعوض اللي راح

ويعلا فوق كل الجراح

ويمد إيده في الضباب

يشد أنوار الصباح

فيكم ولد يا سامعين ؟

(يرد الكورس): أجدع ولد

طب هوه فين ؟ وهوه مين؟

كورس: ابن البلد

يا ابن البلد يا ابن البلد

الوقت وقتك يا ولد

يا قلب مصر ونبضها

كورس: يا ابن البلد يا ابن البلد

يا صبحها

كورس: يا ابن البلد

يا ربحها

كورس: يا ابن البلد

يا قمحها

كورس: يا ابن البلد

يا رمحها

كورس: يا نور سماها وأرضها

آدي كلام المصطبة يا اولاد بلدنا يا طيبين

بعد السلام والمرحبا واضح لكل السامعين

[أحمد فؤاد نجم]

أوأه

 

أوأه المجنون أبو برقوقه

عيره وبرانى وملزوقه

نصاب ومنافق ودماغه

مليانه مناطق موبوءه

والنكته كمان انه حلنجى

وعامل لى فكاكه وحندوقه

مع ان الحجش أفهم منه

والعالم فهمه ومفلوقه

بسلامته بيسرح قال بينا

يعنى احنا مواشى يا زقزوقه

داحنا العريفه الحريفه

غيرش الايام المدعوقه

شفت الولدات الشلبيه

ليلة التحرير يا أسطى فاروقه

أهو دولا ولادنا وأكبدنا

وقلوبنا عليهم مشقوقه

يا سلام يا صلاة النبى احسن

إلى حيل العلم يا مرزوقه

حلوين وحياتك يا بلدنا

يا أم الخيرات المسروقه

احنا اللى رمينا البذرايه

وروينا الارض المعزوقه

وحنحصد بكره وحنغنى

وعيون الخاين مخزوقه

[أحمد فؤاد نجم]

المسحراتي

 

حبلت الايام سنين

ولدت الايام دهور

دامت الايام لمين

وحدّوا المولى الغفور

صلّي ع اللي في القيامة يشفعك

واصحى يللي نمت من اللي بيوجعك

واكشف اللي بيؤلمك و بيمنعك

وانده اللي لو ندهته يسمعك

قول يا جارة

قول يا جار

مهما طال الليل وجار

كل جرم وله مدار

و الكواكب دوارين

وحدّوه يا مؤمنين

صحّي نومك يا اسطى فكري يللي ناسي

هلّ يومك يا اسطى مرسي يللي راسي

يا حبايب مصر يا اْهلي يا ناسي

اللي يعشق بالسهر حتما يقاسي

اصحى يا نايم كفاية

وحّد الانسان معاي

طالت الليل الرحايا

والحدادي قلقانين

وحّدوه يا مؤمنين

..........

يللي صاحيين في البيوت

يللي كاشفين المكان

يللي سامعين السكوت

يللي واعيين للزمان

استعدوا للقيام

استعدوا للقيام

واقبلوا مني الكلام

مصر نايمة من سنين

وحّدوه يا مؤمنين

[أحمد فؤاد نجم]

بوتيكات

 

بوتيكات النات كوا النَّات

وشقق مفروشه وعمولات

يا حلاوه الناوه كوا الناوه

يا بلدنا يا آخر فتاكات

بوتيكات النات كوا النات

**

شبيك لبيك فتح مخط

لبيك شبيك غمض عينك

حتقفّل مخك ح نطخك

ونلوشك لو تفتح عينك

ركب قرنين تركب مازدا

وتعيش سلطان في البرواز دا

مش عاجبك فالجبنه الفازده

والعيش والفول والكرَّات

يا حلاوه الناوه كوا الناوه

يا بلدنا يا آخر فتاكات

بوتيكات النات كوا النَّات

مين فيكوا ما يعرفش عليوه

شيّال المنيا الكحيان

في ثواني اتمول واتحول

بقي مسيو عليوه عليَّان

إزاي؟

ما هي بوظه ومفتوحه

على حس ولاد المفضوحه

وأرانب صاحيه ومدبوحه

تتأستك تبيع البنوكات

يا حلاوه الناوه كوا الناوه

يا بلدنا يا آخر فتكات

بوتيكات النات كوا النَّات

 

**

حتقول الفقرا ومشاكلهم

دي مسائل عايزه التفانين

وأنا رأيي نحلها رباني

ونموّت كل الجعانين

وبهذا ما حشد

ح يجوع

لو نعلن هذا المشروع

وح نقفل هذا الموضوع

نهائياً

ونعيش في تبات

يا حلاوه الناوه كوا والناوه

يا بلدنا يا آخر فتكات

بوتيكات النات كوا النات

[أحمد فؤاد نجم]

 

 

أغنية السلام ..

.............

بانوراما الدنيا فونية .. صندوق الدنيا عصري

الصورة من أميركا .. و الصوت من جوا مصري

لو تفهم كل قصدي .. أوهبلك نص قصري

و اكتبلك الوصية .. على جناح الحمام

و اتفرج يا سلام لم .. و اتفرج يا سلام

....

شوف عندك يا سلام لم .. و اتفرج يا سلام

هزلية مرسحية .. على تياترو السلام ( تياترو : المسرح )

سلام كلام أغاني ... و عليكم السلام

ما عاد على الغلابا عايد غير الكلام

و الحالة كل مادا يا سادة يا كرام

و اتفرج يا سلام لم .. و اتفرج يا سلام

.....

سالمة يا سلامة .. و دليلة رجعت بسلامة

مصرية و من مواليد شبرا .. من تحت نفقها و مجاريها

لو كانوا ما حرقوش الاوبرا .. كانت حتلعلع لياليها

بالغنوة المدهونة شفايف .. غرقانة و سايحة ببلاويها

سيد درويش اللي حيلتنا .. سرقوه و باعوه بيعة ندامة

سالمة يا سلامة .. و دليلة جات بالسلامة ..

....

سالمة يا سلامة .. كوكا كولا جات بالسلامة

 

نشروا الاعلان ... ملو الجرنان

جوا البراويز الدهبية

و التلفزيون بالصوت و اللون

كوكا كولا هي الاصلية

اشرب يا خفيف .. بطّل تخاريف

بلا الطور بلا وطنية

كوكا كولا تفوق و تروق ضد الافكار الهدامة

سالمة يا سلامة .. طير بينا و رفرف يا حمامة

سالمة يا سلامة .. على مصر التانية أم علامة

[أحمد فؤاد نجم]

التحالف

 

يعيش اهل بلدى

وبينهم مفيش

تعارف

يخلى التحالف يعيش

تعيش كل طايفه

من التانيه خايفه

وتنزل ستاير بداير وشيش

لكن فى الموالد

يا شعبى يا خالد

بنتلم صحبه

ونهتف يعيش

يعيش اهل بلدى

يعيش النثقف على مقهى ريش

يعيش يعيش يعيش

محفلط مزفلط كتير الكلام

عديم الممارسه

عدو الزحام

بكام كلمه فاضيه

وكام اصطلاح

يفبرك حلول المشاكل قوام

يعيش المثقف

يعيش يعيش يعيش

يعيش اهل بلدى

يعيش التنابله

فى حى الزمالك

وحى الزمالك

مسالك مسالك

تحاول تفكر تهوب هنالك

تودر حياتك

بلاش المهالك

لذلك

اذا عزت توصف حياتهم

تقول الجياه عندنا

مش كذلك

وممكن تشوفهم فى وسط المدينه

اذا مر جنبك

أتومبيل سفينه

قفاهم عجينه

كروشهم سمينه

جلودهم بتضوى

دماغهم تخينه

سنانهم مبارد تفوت فى الجليد

ما فيش سخن بارد

بيكلوا الحديد

ما دام نهر وارد

وجاى م الصعيد

تزيد الموراد

كروشهم تزيد

وتسمع وتسلم

بأن التنابله

أو الأكلين

حيسمع كبيرهم

ويعمل مقابله

مع الفلاحين

ويحصل تحالف

ما بين الجميع

ونملا المصارف

بدم القطيع

أطيع الخليفه

وأطيع والديك

دا مفروض عليك

تزرع وتبعت لحى الزمالك

وحى الزمالك

مسالك مسالك

تحاول تفكر تهوب هنالك

تودر حياتك بلاش المهالك

لذلك

أذا حد جابلك سيرتهم

تبسمل تكبر

وتهتف كذلك

يغيش التنابله

يعيش يعيش يعيش

يعيش اهل بلدى

يعيش الغلابه

فى طى النجوع

نهارهم سحابه

وليلهم دموع

سواعد هزيله

لكن فيها حيله

تبدر تخضر جفاف الربوع

مكن شغل كايرو

ما يتعبش دايره

لا ياكل

ولا حتى يقدر يجوع

يا غلبان بلدنا

يا فلاح ياصانع

ياشحم السواقى

يا فحم المصانع

يا منتج

يا مبهج

يا آخر حلاوه

يا هادى

يا راضى

يا عاقل

يا قانع

ما تتعبش عقلك

فى شغل السياسه

وشوف انت شغلك

بهمه وحماسه

وعود عيالك فضيلة الرضا

لأن احنا طبعا

عبيد القضا

ورزقك ورزقى ورزق الكلاب

دا موضوع مؤجل ليوم الحساب

كمان الصحافه

جتكتب فى حالتك

وتنشر مناظر لخالك وحالتك

وتتطلع يامسعد عليك الغناوى

وتسمع بأسمك

فى قلب القهاوى

تحبك مشيره وبنات الجزيره

وقصة غرامك

تشيع فى الرداوى

يعيش عم مسعد

يعيش يعيش يعيش

[أحمد فؤاد نجم]

.... فاليري جيسكار ديستان ...

 

فاليري جيسكار ديستان

والست بتاعه كمان

حيجيب الديب من ديله

ويشبع كل جعان

ياسلاملم يا جدعان

ع الناس الجنتلمان

داحناحنتمنجه واصل

وحتبقى العيشه جنان

التلفزيون حيلون

والجمعيات تتكون

والعربيات حتمون

بدل البنزين برفان

وحتحصل نهضه عظيمه

وحتبقى علينا القيمه

فى المرسح أو فى السيما

أو فى جنينة الحيوان

وحتبقى الأشيا زلابيه

ولاحوجه لسوريا وليبيا

وحنعمل وحده أرابيا

مع لندن والفاتيكان

والفقرا حيكلوا بطاطا

وحيمشوا بكل ألاطه

وبدال ما يسوا شلاطه

حيسموا عبالهم جان

ودا بفضل صديكي ( صديقي)

ديستان الرومنتيكى

ولاحدش فيكو شريكى

فى المسكن والسكان

[أحمد فؤاد نجم]

 

البحر بيضحك ليه

 

 

البحر بيضحك ليه

وانا نازله ادلع املا القلل

 

البحر غضبان ما بيضحكش

أصل الحكاية ما تضحكش

البحر جرحه ما بيدبلش

وجرحنا ولا عمره دبل

 

مساكين بنضحك من البلوة

زي الديوك و الروح حلوة

سارقاها من السكين حموة

و لسة جوا القلب أمل

قللنا فخارها إناوي

بتقول حكاوي و غناوي

يا قلة الذل أنا ناوي

ما شرب و لو في المية عسل

 

والبحر بيضحك ليه … ليه

وانا نازلة ادلع املا القلل

 

ياما ملينا وملينا

لغيرنا وعطشنا ساقينا

صابرين وبحر ما يروينا

شايلين بدال العلة علل

 

والبحر بيضحك ليه … ليه

وانا نازلة ادلع املا القلل

 

في بالي ياما وعلى بالي

واللي بيعشق ما يبالي

ما يهمنيش من عزالي

يا حلوة لو مرسالي وصل

 

والبحر بيضحك ليه ليه

وانا نازلة ادلع املا القلل

 

بيني وبينك سور ورا سور

وانا لا مارد ولا عصفور

في إيدي عود قوال وجسور

وصبحت انا في العشق مثل

 

والبحر بيضحك ليه

وانا نازله ادلع املا القلل

[أحمد فؤاد نجم]

 

دلي الشكارة

 

دلي الشكارة جنب الشكارة

و اقعد يا حفني ولعلك سيجارة

فكّـر شوية .. بالعيشة دية

إيه القضية إيه العبارة

 

من صغر سني

شقيان لكني

ما لط سني غير البصارة

....

و دخلت حارة من جوة حارة

و فكل حارة عليت عمارة

و سط المعامل بنا و مناول

بس المقاول كلني بشطارة

و لا خلى صرة و لا لقمة حرة

و العيشة مرة .. أخر مرارة

[أحمد فؤاد نجم]

 

 

هما مين و إحنا مين ...

 

 

 

 

هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

..............

إحنا مين و هما مين ..

إحنا الفعلا البنايين

إحنا السنة و إحنا الفرض

إحنا الناس بالطول و العرض

من عافيتنا تقوم الارض ..

و عرقنا يخضر بساتين

حزر فزر شغل مخك

شوف مين فينا بيخدم مين ..؟؟!!

................

هما مين و إحنا مين ؟؟

هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!

....................

إحنا مين و هما مين

إحنا قرنفل على ياسمين

إحنا الحرب : حطبها و نارها

و إحنا الجيش اللي يحررها

و إحنا الشهدا بكل مدارها

منكسرين أو منتصرين

حزر فزر شغل مخك

شوف مين فينا بيقتل مين ..؟؟!!!

................

 

هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!

.....................

هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة

 

حادي يا بادي يا عبد الهادي

يا اللي عليك قصد الغنوادي ( الغنوة دي أو هذه الاغنية )

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين

[أحمد فؤاد نجم]

 

برولوج ----------------------------------------

يا ليل يا عين ما اعرفش اكدب

طب و اكدب ليه

عدم المؤاخذة

لنا باكتب

و لا أبصر إيه

لا انا احترافي اشتراكية

و لا عندي نزعة رجعيّة

لكني شايف بعنيّه

يا فلاحين يا صنايعية

بر الأمان بان

و المركب

راح ترسي عليه

و انا حاكدب ليه

1971

[أحمد فؤاد نجم]

 

اتجمعوا العشاق

 

اتجمعوا العشاق في سجن القلعة ... اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة .... مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر

...............

تجمعوا و العشق نار في الدم ..... نار تحرق الجوع و الدموع و الهم

نار تشتعل لما القدم ينضم .... لما الايادي تفور في لم اللحم

و اللحم متنتور في رملة سينا .... و الكدب بيحجز على أيادينا

قدم العدو غارسة في لحم ترابي ... و الكدب عشش مخبرين على بابي

و المخبرين خارجين كلاب سعرانة ... بيجمعوا العشاق في الزنزانة

...............

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر

[أحمد فؤاد نجم]

 

 

سقطت سايغون

 

 

أبجد هوز .. حطي كلمن

إقلب صفحة .. امسك قلم ٌ

اكتب زي الناس ما بتنطق

سقطت سايغون رفعوا العلم ٌ

..........

طلعت شمس اليوم ده أغاني

كل ما نسمع نعشق تاني

طلعت شمس اليوم ده حريقة

تكوي الجرح و تبري الالم ٌ

.....

سايغون عادت للثوار

فوق الدم و تحت النار

جدّوا فوجدوا .. زرعوا فحصدوا

و إحنا إيدينا للسمسار

و إللي قالوه السمسارجية

و اللي حكاه السمساردار

لما قروه القرونجية

بالمستعجل و المندار

 

هشت و نشت يعزم الصوت

عن أمريكا و هول أمريكا

زعموا الفانتوم حامل موت

سقط الكوت بعلم أمريكا

جاتكو فضيحة يا طبقة سطيحة

و عاملة فصيحة و جايبة العار

فصحانجية و كلمانجية و سمسارجية

و سمسار دار

[هل تجرؤ على الاعتراف؟؟؟]

السلام عليكم ورحمه الله وبركاته

اهو جاتلى الجرأه وهجاوب دى لحظه تاريخيه

معتقدش انها هتتكرر تانى

بسم الله الرحمن الرحيم

 

ما هو الشيء الذي لا يمكن أن تتخلى عنه أبداً في حياتك ؟؟

دينى واهلى واصحابى ومبادئى

 

 

*** أأنت انسان ملتزم بمبادىء وضعتها العادات والتقاليد والأيام ...أم أنك تحاول خلق مبادىء تتماشى مع منطق خاص بك وحدك ؟

والله من ده على ده واخده شويه من العادات والتقاليد

وفى كتير بقى ماشى مع منطق ليا لوحدى

 

هل تحاول التخلص من ماضيك...حتى وان كان ماض جميل ؟؟

لا للأسف مبعرفش اتخلص منه سواء وحش او حلو

وبعدين لازم نحتفظ بيه عشان نعرف نبنى اللى جاى

 

هل تحاسب نفسك على ما فعلت ؟ أم أنك تكتفي بنظرة عتاب لكل اخطائك وتمضي لقدماً بعد ذلك ؟؟

يووووووووووه ده انا مش بحاسبها ده انا بعذبها بجد

عذاب نفسى وجسمانى

 

 

*** هل ثقتك بنفسك تمنعك من التعبير عن الحب لمن تحب ...تماماً كما يمنعك الضعف من التعبير عن الكره لمن تكره ؟؟

لا مبتمنعنيش انا بعبر عن حبى لاى حد الحمد لله

بس حكايه الكره مبعبرش عنها بكتفى بالصمت

بس مش موضوع ضعف

 

ما هي اللحظات التي تستطيع أن تعطيها لقب " السعادة " وسط حياة ضاعت فيها السعادة ؟؟

لما احس ان ربنا راضى عنى وانى راضيه بكل اللى اداهولى واللى مخدتوش كمان

 

هل سبق وأن شعرت بانتماء لوطن غير وطنك...ولماذا ؟؟

يعنى هو مش انتماء اوى بس انا بحب السعوديه

عشان فيها الكعبه وانا نفسى ازورها

 

أين تجد راحتك ؟؟

بحس براحه اوى لو قعدت ادام البحر

او ادام ارض زراعيه واسعه

 

ماذا استنتجت من منطق الحياة المعاكس...حسب خبرتك الدنيوية فيها ؟؟

انا مش فاهمه السؤال اوى

 

*** ما هو الشيء الذي يعطيك شعور بأنك ولدت من جديد ؟؟ اهو انتصار حققته أم ابتسامة طفل بريئة امامك...او غير ذلك ؟؟

والله مش دايما ساعات لما احقق انتصار

وساعات لما اشوف ابتسامه طفل

بس اكتر حاجه تحسسنى انى اتولدت من جديد لما اتغلب على احزانى

 

ما هي بنظرك أتعس اللحظات في حياة الانسان ؟؟

لما تبقى محتاج شخص يكون قريب منك اوى ويديلك ضهره

ولما تتجرح من اقرب الناس ليك

 

كم من مرة تمنيت الموت وهل ما زلت تتمناه ؟؟

اتمنيته بس مش فاكره كام مره بالظبط

ومعنتش بتمناه الحمد لله

 

متى تعلن استسلامك للضعف ؟؟

لما افقد الامل

 

هل شعرت يوماً بأنه حان الوقت لإلغاء وجود حياة والديك من حياتك الخاصة ؟؟

لا طبعا ربنا يخليهم ليا

 

هل تنظر للجزء الممتلىء من الكأس ام للجزء الفارغ منه عند مواجهتك للمشكلات ؟؟

بصراحه فى اول المشكله بتجيلى حاله يأس وببص للجزء الفارغ

بس بعد فتره ليست بقصيره ببص للجزء المليان

 

هل تؤمن بالصدفة أم أنك ترى بأن كل شيء مقدر له بأن يحدث حتى الصدفة ؟؟

لا مبؤمنش بالصدفه كل شىء مقدر

 

هل تحاول صناعة حياتك بنفسك أم أن الحياة تنجح دائماً في صناعتك حسب ما تريد ؟؟

لا هى الحياه غلبانى شويه بس انا بحاول والله اغيرها

وهصنع حياتى بنفسى ان شاء الله

 

ما هو شعارك في الحياة ؟؟

قدر الله وما شاء فعل

محدش بياخد اكتر من نصيبه اللى مكتوب له

امشى عدل يحتار عدوك فيك

 

هل يسهل عليك الدفاع عن نفسك....حتى لو تطلب الأمر منك أن تجرح غيرك ؟؟

بدافع عن نفسى اه بس لو الامر هيجرح غيرى بكتفى بالصمت

مبقدرش اجرح حد لوحتى غلطان فى حقى

 

 

*** ماذا تعني لك الحياة بكل تجاربها....بكل مآسيها...بكل فرحها وحزنها....؟؟

وماذا تريد من الحياة ؟؟ وهل فعلاً استطعت تحقيق ولو حتى نصف ما تريد ؟؟

الحياه عمر قصير مهما طول

اريد من الحياه انها تبقى عمل صالح توصلنى للجنه ان شاء الله

اه الحمد لله حققت حاجات بس لسه موصلتش لنص اللى عايزاه

 

ما هو الشيء الذي تحاول الهروب منه دائماً ؟؟

بهرب من مقابله شخص معين

 

 

وما هو الشي الذي تلاحقه دائماً الا انه بدوره يهرب منك....؟؟

راحتى النفسيه

 

 

 

***اعط عنواناً مناسباً....

 

 

للموت...

حقيقه الحياه القاسيه

 

 

وللحياة....

الحياه حلوه بس نعيشها صح

 

 

ولرواية حياتك.....

روايه طويله غير صالحه للقراءه

 

 

 

 

*** ماذا يعني لك كل من :

 

 

الحب.....

احلى احساس

 

الزواج....

سكينه وموده ورحمه وتاج الحب

 

الصداقة....

احلى علاقه

 

الأطفال....

جنه الدنيا

 

غروب الشمس .....

احلى منظر تشوفه عنيا

 

بكاء المرأة......

ابسط حقوقها بيريح ساعات

 

والمطر......

بحبه جدا احساسه جميل برتاح لما اشوفه

بشوف فيه رحمه ربنا

 

 

 

*** ما هو أجمل سؤال لفت نظرك من بين جميع الأسئلة ؟؟

كلهم لفتو نظرى بصراحه

 

 

وما هو السؤال الذي نال اعجابك لدرجة انك لا تستطيع أن تجيب عليه ؟؟

ما هو الشيء الذي تحاول الهروب منه دائماً ؟؟

عجبنى اوى قعدت افكر فيه كتيييييييييير

 

انا جاوبت بكل صراحه والله

تسلمى يا انجل اسئله روعه

تعبتنى فى التفكير جدا

يارب بس اكون فهمتها صح

[اكتب الشي الذي تفــتقـــده]

السلام عليكم ورحمه الله وبركاته

فكره جميله يا خالد والله تسلم ايدك

جميل انك تكتب الشىء اللى مفتقده فى حياتك

بس الاجمل انك تلاقيه

انا عن نفسى مبفتقدش حاجات كتير

انا الحمد لله راضيه بكل حاجه

بس دلوقتى مفتقده اهم حاجه

نفسى

[اختبر قوة شخصيتك]

السلام عليكم ورحمه الله وبركاته

تسلم ايدك يا توتايا عالموضوع الجميل ده

انا 43

 

النقاط من 41 إلى 50

 

الآخرين يرونك شخصية نشيطة , حيوية , ممتعة , مسلية , عملية , ودائماً ممتع

 

شخص تجذب الانتباه , شخص متوازي ولا تزعج الآخرين

 

وهم يرونك أيضا لطيف , حذر , متفهم

 

شخص دائماً يبهجهم ويساعدهم

 

شكرا يا توتايا

[اغرب من الغرابه]

السلام عليكم ورحمه الله وبركاته

جزاك الله كل خير وجعله فى ميزان حسناتك ان شاء الله

موضوع جميل

[ماء زمزم غير صالح للشرب؟؟]

السلام عليكم ورحمه الله وبركاته

سبحان الله ولا حول ولا قوه الا بالله

تسلم ايدك يا نومو عالمعلومات دى

[قصيده لشاعر القائد]

السلام عليكم ورحمه الله وبركاته

بما انى جهبوزه فى اللغه العربيه

وبما انى انا وابى فراس الحمدانى زمايل بنش واحد

فأكيد القصيده روعه

وتسلم ايدك يا جوووووو انك نشرتها

شكرا ليك