go3lesa قام بنشر March 17, 2007 Share قام بنشر March 17, 2007 حكايات زينات وسنيه يا أنا .. يا القهوة .. عدى اليوم على خير وطبعاً حنفــي مش عايز يتعب نفسه ويفهم سنية أي حاجة متعلقه بخصوص النوم فهو بيفضل يسكت ويقضي الوقت إللى هي بتقضيه في النوم مع أصحابــه .. وفي اليوم التاني راحت سنيــة شغلها وطبعاً هناك هتقابل صديقتها الحبيبة زينـــــات .. بعد السلامات والتحيات .. وطبعاً بحكم أنهم في مكتب واحد شوية يشتغلوا وشويتين يرغوا .. وفي الفاصل الأخير قبل ميعاد الأنصراف .. أتفجأت سنية .. أن زينات بتكلم ماما .. زينات : أيوة يا ماما يعني حسني عندك ..؟؟ زينات : طيب خلاص أنا هرجع على عندكم ؟؟ زينات : طيب وزكية موجوده النهاردة ..؟؟ زينات : لا خلاص ما تتعبي نفسك .. أنا هجيب كل الحاجات وأنا جيه وأعملها على طول مش هناخد وقت .. زينات : سلام يا ماما طبعاً أتلغبطت سنية جداً .. حسني عندك .. !! زكية موجودة النهاردة !! وفرت على نفسها الحيــرة وسألتها .. سنية : معلش بقى فهميني .. حسني .. زكية .. ماما ..!!!! زينات : كنت بكلم حماتي بقولها أنا رايحة عندها النهارده .. سنية : حماتــك .. ماما .. رايحة عندها النهارده!!!! زينات : أه .. مش أحنا يا سنية يا حبيبتي لما رجعنا من عند الشيخة بلحة ..أتفقنا أننا ندور على الحاجات إللي تسعدنا أزواجنا ونعملها .. سنية : أه .. حصل زينات : أنا بقى لقيت أن أكتر حاجه تفرح جوزي.. أنا أحب أهله .. وأديني أهوه بحاول أني أكسبهم علشان حسني حبيبي يرضى عني .. سنية : طيب وأنا أعمل أيه بقى علشان أرضي حنفي .. أنزل أقعد معاه على القهوة مع أصحابه ..؟؟ زينات : لا .. هو متعلق بأصحابه ليه فكري في السبب .. بعدين هتعرفي الحل فين .. ( قالتها وهي بتحط موبايلها في شنطتها .. سلام أنا بقى واخدة أذن .. رايحة عند ماما ) سنية وهي بتبص لزينات بذهول : يعني أروح أسأل أصحابه زينات : يوووووووه .. شغلي مخك .. سلاااااام سنية : في شرود .. سلااااااااااااااام وقعدت سنية المسكينة تفكر .. يا ترى ليه بينزل يقعد مع أصحابه على القهوة .. ياترى ليه يا ترى ليه ... روحت سنية البيت بعد ميعاد الشغل .. وطبعاً بهدوئها الممل .. قعدت ترتب البيت متهيألى لو سلحفاة كانت خلصت البيت أسرع منها .. وطبعاً زي العادة جيه حنفي .. لاقى البيت يضرب يقلب .. وما شاء الله على رائحة البصل والثوم .. إللى استقبلته مع سنية .. سلم عليها من بعيد لبعيد .. (ده راجل شيك جداً يا جماعه) ودخل يجري على الحمام أخد شاور سريع سريع .. بعدين خرج يكلم أصحابه ..(في التليفون طبعاً) وكانت سنية مشغولة بمسح ترابيزة السفرة .. سمعته وهو بيقول : يعني النهارده الماتش .. طيب مين هيلعب الأول ...؟ يا سلام إن شاء الله هنغلبهم 6 /2 لالا قبل الماتش هتلاقوني في الكافية .. على الساعة سبعة بالدقيقة هكون موجود إن شاء الله سنية : قالت وهي تحدث نفسها .. يا سلام أد كده مستني الماتش .. لا وأيه الحماس ده .. وسبعة بالدقيقة .. ما يكونش الراجل ده من الناس إللي بتحب الكورة أوي (ياااااااااااااااه يا سنية بعد 3 سنين زواج لسه عارفه .. ) .. طيب أعمل أيه دلوقتي .. أنزل معاه أقعد على القهوة أقصد الكافية أتفرج مع أصحابه على الماتش أنا أصلاً ما بحبش الكورة خالص .. وكل إللي أعرفه عنها أنها مدورة زي البطيخة .. وهو أصلاً مش هيوافق ياخدني معاه .. طيب وأنا أصلاً هنزل أقعد مع أصحابه .. مش عارفه أعمل إيه .. فينك يا زينات تدبريني .. هربت سنية من أفكارها ودخلت مطبخها علشان تحضر الأكل .. وهي بتحضر الأكل لاقت على المطبخ جرنال ولنصيبها الجرنال مفتوح على صفحة الرياضة .. فتحت سنية الجرنال .. وعرفت أن النهارده فيه ماتشين بس يا تري حنفي بيشجع مين ..؟؟ ده الموضوع طلع صعب أوي .. طيب النهاردة ماتش الأهلي مع مانشيستر يونيتد .. يا ستير يارب مافيش أسم أسهل من كده والزمالك وغزل المحلة .. أمممممممم وحنفي بقى أهلاوي ولا زملكاوي ..؟؟ لا حنفي بيحب يتمنظر أكيد بيشجع الأسم الغريب ده .. لا .. كلام الشيخ بلحة على عيني وراسي .. بس حكاية الكورة دي غريبة أوي .. أنا كل إللي أعرفه عنها أنها مدورة زي البطيخة .. الله يرحمك يا بابا عمرك ما أتفرجت على ماتش وفرت سنية التفكير ده كله عليها ودخلت سنية غرفة المعيشة على حنفي وبذكاء المرأة المعهود .. سألت حنفي .. هو الماتش النهاردة الساعة كام ؟؟ حنفي : ماتش إيه ؟؟ سنية : الكورة .. حنفي : وإنتِ من أمته ليكِ في الكورة .. سنية : من زمان .. من ربع ساعة كده مثلاً .. حنفي مندهشاً جداً: بجد لا خبرة جامدة جداً .. طيب إيه رأيك تروحي تحكمي أنتي النهاردة .. سنية بخيبة أمل ( لأن عادة الرجل لا يقابل أي تغير من زوجته إلا بكل الكلام إللى يفقع المرارة ) : لا ماليش نفس النهاردة .. حنفي : أه طبعاً .. مش هتكوني فاضية سنية : وأشمعنى بقى .. ورايا أيه ..؟؟ حنفي : لا ولا حاجة .. بس سيادتك هتكوني في جزيرة القطن .. سنية : لا لا .. ده أنا النهارده بالذات ليه نفس أوى أقعد معاك نتفرج على الماتش .. حنفي: (وجه مندهش) سنية : أيوة طبعا .. حنفي : (وجه مندهش) .. بس أنا نازل على الكافية أتفرج عليه مع أصحابي سنية : يا سلام .. وهو وأنا ماليش نفس أقعد معاك شوية .. أعتبرني يا سيدي واحد من أصحابك حنفي : بس بس هنتخانق على أيه .. حاضر يا ستي هقعد (بس عارفة يا سنية لو سبتيني ونمتي ) سنية : أستعد بقى علشان الماتش .. إن شاء الله هتتغلبوا .. لالا قصدى هتغلبوا .. حنفي : وأستعد ليه هو أنا إللى هلعب سنية : (وجه هيطق) الأكل جاهز يا أفندم .. أكلت سنية مع زوجها .. وكالعادة أكلت من هنا وحست أنها نعسانة بشكل فظيع .. بس مش هينفع تنام دي قالت لحنفي .. أنها هتشوف الماتش معاه .. وبعدين الراجل يا عيني ما صدق أتصل بأصحابه وقالهم أنه مش رايح القهوة .. سنية: أه .. القهوة .. أعمل مج قهوة من بتوع أيام الجامعه .. ممكن أسهر شوية .. شربت سنية القهوة من هنا .. والحمد لله رب العالمين فاقت بعض الشئ من الغيبوبة إللى بتروح فيها .. وجيه ميعاد الماتش .. وقعدت سنية وحنفي يتفرجوا على الماتش .. وبدأ حنفي يتعصب .. وسنية لا حول لها ولا قوة فهى لا تفقه شئ في الكورة .. حتى أنها مش عارفه تفرق بين الجول بتاع فرقتنا والجول بتاع الفريق التاني .. بس بقت تعمل زي ما حنفي بيعمل تمام .. يضحك تضحك .. يتنرفز تتنرفز .. حنفي : مش عارف هو فيه إيه النهارده مش عارفين يلعبوا ليه ؟ سنية : صحيح مش عارفين يلعبوا ليه .. حنفي : دول كسفونا .. سنية : أه والله عندك حق .. دول كسفونا جداً كمان .. أبتسم حنفي لسنية .. وفهم أنها أتفرجت بس على الماتش علشان خاطره هو بس .. عامله زى البغبغان بتردد كلامه .. وضحك حنفي ونسي الماتش .. أد أيه أنتي عسولة يا سنية ( قالها حنفي في باله طبعاً) استنو اخر حلقه اللى جايه كل اللى بيحصل فى حياتنا او يوم عشناه هتدور تلقاه فى السنه وكتاب الله ربنا مخلقناش كده تايهين وهدانا بسنه وشرع ودين بيهم راجعين بيهم عايشين دى حياتنا فى دينا ودينا حياه رابط هذا التعليق شارك More sharing options...
!! SiLeNcE !! قام بنشر March 17, 2007 Share قام بنشر March 17, 2007 والله زعلتيني لما قلتي اخر حلقة تسلم إيديكي رابط هذا التعليق شارك More sharing options...
LoVe AnGeL قام بنشر March 18, 2007 Share قام بنشر March 18, 2007 تسلم ايديكي يا جعلصتي ومستنين اخر حلقة من بكيزة وزغلول :D :D:D رابط هذا التعليق شارك More sharing options...
go3lesa قام بنشر June 18, 2007 الكاتب Share قام بنشر June 18, 2007 السلام عليكم ورحمه الله وبركاته تسلم يا حماده على ردك ومرورك نورت القصه ومتزعلش انه اخر جزء عرفو غلطهم وصلحوه نسيبهم بقى يعيشو حياتهم :Mazakonia (92): كل اللى بيحصل فى حياتنا او يوم عشناه هتدور تلقاه فى السنه وكتاب الله ربنا مخلقناش كده تايهين وهدانا بسنه وشرع ودين بيهم راجعين بيهم عايشين دى حياتنا فى دينا ودينا حياه رابط هذا التعليق شارك More sharing options...
go3lesa قام بنشر June 18, 2007 الكاتب Share قام بنشر June 18, 2007 السلام عليكم ورحمه الله وبركاته تسلمى يا انجولتى على ردك ومرورك نورتى القصه يا قمر بس مين بكيزه وزغلول؟ دى خالتك سنيه وخالتك زينات :Mazakonia (92): كل اللى بيحصل فى حياتنا او يوم عشناه هتدور تلقاه فى السنه وكتاب الله ربنا مخلقناش كده تايهين وهدانا بسنه وشرع ودين بيهم راجعين بيهم عايشين دى حياتنا فى دينا ودينا حياه رابط هذا التعليق شارك More sharing options...
~MIDOZ~ قام بنشر July 3, 2007 Share قام بنشر July 3, 2007 تسلم ايديك ياجوعليصة على قصة بكيزة وزغلول رابط هذا التعليق شارك More sharing options...
go3lesa قام بنشر July 4, 2007 الكاتب Share قام بنشر July 4, 2007 السلام عليكم ورحمه الله وبركاته تسلم يا ميدو على ردك ومرورك نورتى بكيزه وزغلول يا عم هو انا اقدر ازعلكو كل اللى بيحصل فى حياتنا او يوم عشناه هتدور تلقاه فى السنه وكتاب الله ربنا مخلقناش كده تايهين وهدانا بسنه وشرع ودين بيهم راجعين بيهم عايشين دى حياتنا فى دينا ودينا حياه رابط هذا التعليق شارك More sharing options...
Recommended Posts