Egyptian_Muslim

السلام عليكم ورحمة الله وبركاته أنا جيت :D إزيكم يا شباب أخبار الهدف والنية إيه ؟؟ تمام ؟؟ بتحلوا الواجب ؟؟ قدرتم تجددوا نيتكم بحيث تبقي علي طول ملائمة للهدف بتاعنا ؟؟ ما شاء الله أنا عارف أنكم قدها بإذن الله طيب زي ما وعدتكم..النهاردة إن شاء الله كلامنا هيكون عن علو الهمة.. شباب الصحوة الحلقة الثالثة Summer 2006 يللا نبدأ الأول بس علشان محدش يتوه... أنا أقصد بعلو الهمة يعني الهمة العالية..شفت سهلة إزاي ؟ أنا أقصد الهمة العالية يعني أنك علي طول تكون متحمس لتحقيق هدفك... مش هتكسل عنه...مش هتنساه...مش هتغفل.. مش هتيأس أبدا بإذن الله.. يعني عايزن من الآخر : همم تصارع قمم الجبال.. قبل ما نقول أي حاجة لازم تعرف وتوقن كمان أن علو الهمة دي هبة من عند الله ونعمة غالية تستوجب أن نشكره ونحمده تعالي عليها.. لأن ربنا سبحناه وتعالي بيقول: (( لَئِن شَكَرْتُمْ لأَزِيدَنَّكُمْ )) (سورة إبراهيم - من الآية 7) يبقي لازم نحمد ربنا علي النعمة دي علشان تزيد.. وكمان أوعي تظن أبدا أن علو الهمة ده جاء من عندك.. لأن احنا متفقين أن الإنسان ضعيف ولا يقدر علي شيء إلا بإذن الله ... إزاي بقي نسعي لتحصيل الهمة العالية ؟ من أهم الأسباب تذكر الهدف واستحضار النية الصالحة.. يعني لما تتذكر علي طول أنك بتعمل العمل ده علشان خاطر تحقق هدفك الرئيسي اللي هو رضا الله تعالي... علشان تفوز بجنته سبحانه.. وتستحضر نية كويسة في عملك ده زي ما قلنا المرة اللي فاتت.. إن شاء الله ده يكون سببا في إشعال همتك... لأنك بتبص لقدام...أنت مش بتبص تحت قدميك..لأ أنت مسلم عليّ الهمة...بتبص لهدفك..وهدفك أمامك مش أسفل قدميك.. ثانيا اقرأ كثيرا عن وصف الجنة والنار..... احفظ في قلبك آيات الله تعالي وأحاديث رسول الله صلي الله عليه وسلم عن وصف الجنة والنار.. لأن هذا جدير أنه يوقد همتك.. وكل ما تلاقي حاجة في الدنيا تغريك أنك تحيد عن الطريق المستقيم أو تنسيك هدفك علي طول افتكر الجنة ونعيمها المقيم...وأنك لما تترك العمل المحرم ده في الدنيا ربنا هيعوضك أفضل منه بكثير إن شاء الله في الجنة.. وأيضا استحضر آيات العذاب حتي لا تغفل لحظة فتقع في ذنب ... يا اللي عمال تبص للبنات حرام عليك !! بقي تضيع الحور العين في الجنة علشان خاطر نظرة في الدنيا تليها حسرة ؟؟ يا اللي لسانك مش مستقيم..كفاية غيبة ونميمة وسب وبذاءة..يا أخي ما تجعلش كلمة بسيطة تكون سبب حتي في أن درجتك في الجنة تنزل.. طب بالله عليك يا أخي..مش خسارة علشان خاطر كلمة تقولها...ولا نظرة تبصها...ولا فعل تفعله..مش خسارة حاجة تافهة زي دي تحرمك من رفقة الرسول صلي الله عليه وسلم في الفردوس الأعلي ؟؟ يا أخي أنت تتحرق شوقا لرؤيا الحبيب صلي الله عليه وسلم...أنت مشتاق له يا أخي !!...اصبر شوية علشان نشرب من إيده علي الحوض إن شاء الله.. ثالثا خللي بالك ..ربنا سبحانه وتعالي أعطاك إمكانيات وقدرات معينة...وأنت عليك تستغلها صح...قدمت إيه لدين الله حتي الآن ؟؟ طيب وناوي تقدم إيه ؟؟ هدفك يا أخي ماشي ناحيته ولا حدت عنه ؟؟؟!! الفرق بينك وبين العباقرة والمجددين هو استغلال العقول والقدرات,,مش موضوع أنهم أذكي أو أحسن.. يقول وليم جيمس وهو أبو علم النفس الحديث (( إن الفرق بين العباقرة وغيرهم من الناس العاديين ليس مرجعه إلي صفة أو موهبة فطرية للعقل , بل إلي الموضوعات والغايات التي يوجهون إليها هممهم وإلي درجة التركيز التي يسعهم أن يبلغوها )). ما تضيعشي لحظة ! هتقول مش مهم اللحظة دي..واللحظة دي...تلاقي في الآخر ضيعت ساعات وأيام بدون فائدة إن لم يكن في ضرر.. الوقت ضيق يا أخي واحنا ورانا شغل كتير... قال رسول الله صلى الله عليه وسلم: ((من خاف أدلج، ومن أدلج بلغ المنزل، ألا إن سلعة الله غالية، ألا إن سلعة الله الجنة)) رواه الترمذي وقال حديث حسن. و<أدلج> معناها: سار من أول الليل. والمراد: التشمير في الطاعة، والله أعلم. اقرأ علي طول في سير الصحابة والتابعين والأئمة...شوف كانوا بيعملوا إيه علشان يحققوا أهدافهم وينالوا رضا الله تعالي... مش هم كانوا بشر زيي وزيك ؟؟ مش كانوا محتاجين للأكل والشرب والنوم ؟؟ أمال ليه هم وصلوا واحنا لسه مش قادرن نتحرك !!!! بص يا أخي...أنت والصحابة والتابعون وأتباعهم علي خط سباق واحد...هل أنت أهلا للسباق ده ؟؟؟ العبادات...أكثر من العبادات...انسي كلمة "أصلها سنة" و "دي مش فرض" و "هو لازم" والكلمات المحبطة دي.. طالما حاجة وردت عن الرسول صلي الله عليه وسلم يبقي ننفذها... أصل احنا مش عايزين ننجح وخلاص..لأ احنا عايزين ننجح بتفوق..يعني بامتياز...يعني الفردوس الأعلي يا أخي !! الصبر يا أخي..مهم جدا مش مجرد أنك تفشل مرة توقف المحاولة...بالعكس.. لازم تصبر وتبدأ تاني.. إياك تخللي فشلك هو نقطة وقوفك...بالعكس ده أنت تحول كل فشل يمر بيك إلي خبرة عندك توصلك للنجاح التالي.. لله در من قال: إني رأيـت في الأيام تجربة للصبر عاقبة محمــودة الأثر وقل من جد في أمر يطالبه واستصحب الصبر إلا فاز بالظفر اجتهد في تقليل أوقات الترفيه والنوم, فإن العمر قصير. وكمان فيه ظاهرة غريبة شايفينها حوالينا كل يوم نلاقي أعداء الإسلام يعملوا حاجة جديدة ويتحركوا خطوة في طريقهم..واحنا كسلانين...أكتر حاجة عندنا الكلام... وده مش المطلوب ! مطلوب كلام مع أفعال...مطلوب كلام مع تنفيذ...مطلوب كلام مع حركة... قال تعالي: (وَلاَ تَهِنُواْ فِي ابْتِغَاء الْقَوْمِ إِن تَكُونُواْ تَأْلَمُونَ فَإِنَّهُمْ يَأْلَمُونَ كَمَا تَأْلَمونَ وَتَرْجُونَ مِنَ اللّهِ مَا لاَ يَرْجُونَ وَكَانَ اللّهُ عَلِيمًا حَكِيمًا) ( النساء :104 ) إياك ترضي بالمستوي الأقل...ولا حتي بالوسط...علي الهمة أنت...مثابر مقدام... ولا هترضي بالوسط.. معني أنك ترضي بالوسط أنك تترك الأعلي لغيرك...ومحدش يستحق المكانة العليا إلا أنت ! أوعي تتواكل وتقول "أنا هأستني لما ربنا يرزقني علو الهمة"...كده غلط..فالله عزيز...عليك البداية وعلي الله التمام.. قال تعالي: (وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ) (العنكبوت:69) وكمان الدعاء.. دائما ادع الله تعالي أنه يرزقك علو الهمة...وأنه يعينك علي تحقيق أهدافك... قف بين يدي الله في الليل واخشع واخضع..تضرع وابك..اشك نفسك لمن خلقها.......بث شكواك لله يا أخي.. من أين لك بالهمة العالية ؟؟ من الله ؟؟ أيوة من الله !! اطلبها من الله يا أخي ! اجتهد في التركيز حتى تعتاده. يقول وليم مولتون المتخصص في علم النفس (( وهذه القدرة تكتسب بالمرانة , والمرانة تتطلب الصبر فإن الانتقال من الشرود إلي حصر الذهن حصرا بينا محكما هو ثمرة الجهد الملح , فإن استطعت أن ترد عقلك مرة بعد أخرى وخمسين مرة ومئة مرة إلي الموضوع الذي عزمت معالجته فإن الخواطر التي تنازعك لا تلبث أن تخلي مكانها للموضوع الذي آثرته بالاختيار ثم تلقي نفسك آخر الأمر قادرا علي حصر ذهنك بإرادتك فيما تختار )) أخي.. اصدقني القول.. أمتنا بحالها ده تقدر تعمل حاجة ؟؟؟ تقدر تتقدم ؟؟؟ أمتنا مفتقدة البدر اللي يرشدها... أمتنا ناقصها الناصح اللي يوجهها... أمتنا منتظرة المصلح اللي ينصرها... عارف ده مين يا أخي... ؟؟؟ أنت ! إيه المانع أنك تكون أنت اللي هترجع المجد لأمتنا ؟؟ قل لي مانع واحد ؟؟؟؟ أنت مسلم....بس خلاص خلصت !! مفيش أي مانع... أنت اللي مقيد نفسك بقيود من صنعك أنت... ومحدش هيقدر يفكها غيرك... ومش هتقدر تفكها إلا لو استعنت بالله.. قال صلى الله عليه وسلم: احرص علي ما ينفعك واستعن بالله ولا تعجز (رواه مسلم). .. أخي أنت واقف علي بداية طريق... آخر الطريق ده فيه ضوء كبيييييير...وأنت عايز توصل له... بتحاول توصل للضوء ده.. بتتحرك خطوة بخطوة... الطريق ده هو المنهج اللي هتمشي عليه.. النور ده هو هدفك اللي عايز توصل له.. كل خطوة بتخطوها هي هدف قريب بتحققه علشان يوصلك لهدفك الرئيسي... علشان تتحرك صح محتاج حاجة تدفعك..الحاجة دي هي همتك العالية... أنت محتاج تبص دائما للهدف بتاعك...محتاج تستحضر دائما نيتك الخالصة... وإلا هتشرد ويجذبك نور تاني ضعيف علي جنب الطريق...ولو وصلت له هتكتشف أنه نار مش نور...لأنك لم تخلص النية فيه...لأنه فتنة أغرتك في لحظة ضعف.. لو بصيت تحتك هتقع...لو بصيت وراك هتكسل... أخي.. الطريق قدامك.. وهدفك منور لك طريقك... وقد أعطيتك المحرك بفضل الله... أخي... انـــــــــــــــطلق !!

جزاك الله خيراً

جزانا و اياكم و احسن مثواكم

جزاك الله خيراً يروى عن النبى صلى الله عليه و سلم أنه رفع رأسه من الركوع، وقال " سمع الله لمن حمده" فقال رجل من المصلين وراءه ربنا ولك الحمد حمدا كثيرا طيبا ولما انتهت الصلاة، قال النبي عليه الصلاة والسلام : من الذي قال ذلك ؟ قال الرجل : أنا ، قال صلى الله عليه وسلم : رايت بضعة وثلاثين ملكا يتدبرونها .. أيهم يكتبها أول و الصيغ اللى حضرتك ذكرتها برضه كلها صحيحة ان شاء الله بالنسبة لموضوع الطهارة و الوضوء انصحك تسمع درس للشيخ محمود المصرى اسمع لقاء مع مصلى ده اللينك mp3 http://media.islamway.com/lessons/masry//4..._M3_Mossaly.mp3 و ده rm http://media.islamway.com/lessons/masry//4...2_M3_Mossaly.rm

حلو اوى التنافس على الطاعة ده :D جزاك الله خيراً virus dead

السلام عليكم ورحمة الله وبركاته إزيكم يا شباب :) أخبار الحلقة اللي فاتت إيه ؟؟ حليتم الواجب ولا لأ ؟؟ :P الحمد لله بعد ما تبنا إلي الله تعالي ..كان فيه حاجة نسيت أقولها صحيح.. دائما لازم نفتكر نجدد التوبة..مش بنتوب مرة وبعد كده ننام..لأ ، يقول رسولنا صلي الله عليه وسلم: ((والله إني لأستغفر الله وأتوب إليه في اليوم أكثر من سبعين مرة)) رواه البخاري. طيب جميل جدا...دلوقتي بقي عايزين نتكلم عن الحلقة الثانية شباب الصحوة صيف 2006 الحلقة دي هتكون جميلة إن شاء الله...هتكتشف فيها حاجات حلوة في نفسك.. قلنا علشان نبدأ صح لازم نبدأ علي نظيف...علشان كده ذكرنا التوبة..نسأل الله تعالي أن ينفعنا بما نقول.. وبعد كده في بداية طريقنا علشان نقدر نستمر بإذن الله هنحتاج لثلاث حاجات متلازمة.. نية خالصة هدف محدد همة عالية الثلاثة بيكونوا مع بعض..لأن أنت علشان تعلي همتك في الطريق لازم يكون لك هدف واضح محدد ونية خالصة تستحضرها.. ونيتك أصلا هتكون مناسبة للهدف بتاعك...و الهدف لازم يكون خالصا لوجه اله تعالي شفت بقي كلهم مرتبطين ببعض إزاي.. طيب إزاي هنجيب الثلاثة دول ؟؟ تعالي نبدأ بموضوع الهدف... لو سألت أي واحد تعرفه إيه هدفك..ممكن يسكت ما يعرفشي يرد..وممكن يقعد يحكي لك كتير.. أنت بقي إنسان مختلف...هدفك لازم يكون محدد ، حتي لو هدف عام..ولازم يكون هدفا ساميا..يعني إيه ؟؟ يعني باختصار لما أقول لك إيه هدفك تقول لي أنا هدفي رضا الله ومن ثم الجنة... رضا الله ومن ثم الجنة !! كلمة بسيطة..لكن هدف عظيم ! ولو دققت هتلاقي أنه هدف واضح ومع ذلك فهو شامل.. يعني أنت عايش لهدف محدد...أنت عايز تنال رضا الله تعالي...وطلبك طلب محدد..اللي قلناه الحلقة اللي فاتت..أنت طلبك الجنة.. رائع ! تصور بقي لما يكون كل عمل بتعمله هدفك فيه رضا الله...أي عمل مهما كان صغيرا,... كل ما تيجي تبدأ في حاجة تفتكر هدفك ده ... ما شاء الله..بالله عليك مع هدف راق زي ده إزاي هتفقد الأمل ؟؟؟ أنا هدفي رضا الله سبحانه..وطلبي جنته بل الفردوس الأعلي هدف صحيح وعظيم ، هدف واضح محدد وفي نفس الوقت شامل وعام وعلي فكرة...هدفنا ده كده هنسميه "الهدف البعيد"...يعني الهدف العام من حياتك ..((مش معناه بعيد يعني صعب ، لأ بعيد يعني يعني هدفك الأصلي )) يقول الله تعالي: ((وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ))[الذاريات : 56]..يبقي الهدف من خلقك أصلا أنك تعبد ربنا سبحانه.. علشان نقدر نوصل بإذن الله للهدف البعيد ده هنحط شوية أهداف قريبة...دي بقي أنت تحددها مع نفسك.. يعني زي مثلا ما تقول : أنا إن شاء الله هأحفظ سورة البقرة خلال الصيف ده..أو إن شاء الله هأخلص الكتاب ده خلال الأسبوع الجاي..وهكذا.. بتحط أهداف كتيرة قريبة بحيث أهدافك القريبة دي هتمشي عليها علشان توصلك لهدفك البعيد إن شاء الله..فهمت قصدي ؟ وكمان أنت ممكن تحول أي عمل بتعمله بحيث يتلاءم مع هدفك ده..يعني أنت مثلا بتذاكر علشان تنجح ..أو بتشتغل علشان تجيب فلوس...كل ده ضروري ومطلوب..ولو استحضرت له نية كويسة هتلاقيه مش متعارض إطلاقا مع الهدف بتاعك.. أنت بتذاكر علشان تنجح..وعايز تنجح علشان تقدر تفيد المسلمين بعلمك ده...وتقدر تكسب بعدها من عمل جبينك...وترضي والديك.. أنت بتشتغل علشان تجيب فلوس...علشان تقدر تشتري الأكل والشرب واللبس وكل المتطلبات ليك علشان تعينك علي طاعة الله تعالي...وكمان لو مسئول عن أسرة تخيل بقي الثواب اللي بتأخذه بإذن الله وهكذا... شفت دخلنا في موضوع النية واحنا مش واخدين بالنا.. يعني بندور احنا نيتنا إيه من العمل اللي بنعمله ده...ليه بنعمله ..عايزين منه إيه.. من هنا ورايح هتخللي كل عمل بتعمله - برضه مهما كان صغير - نيتك فيه نية صالحة... يعني لو أنت كنت مقبلا علي حاجة معينة عايز تعملها...قف مع نفسك ثواني بسيطة قبل ما تبدأ فيها..فكر كده...أنت بتعمل العمل ده ليه ؟؟ هل نيتك فيه صالحة وخالصة ولا يشوبها هوي نفس أو إغراءات شيطان ؟؟ ما احنا اتفقنا بقي من المرة اللي فاتت أننا لازم نتخلص من هوي النفس ومن وساوس الشيطان..مش هأقعد أعيد بقي ((لو مش فاكر ارجع بص في المرة اللي فاتت علشان ما أطولشي عليك )) أنت عارف ليه أنا كل شوية أقول لك "مهما كان عملك صغير " ؟؟؟ اقرأ وأنت تعرف...يقول الله تعالي: ((فَمَن يَعْمَلْ مِثْقَالَ ذَرَّةٍ خَيْراً يَرَهُ (7) وَمَن يَعْمَلْ مِثْقَالَ ذَرَّةٍ شَرّاً يَرَهُ (8) ))[الزلزلة : 7 و 8] شوف يا أخي...مثقال ذرة ... فقط مثقال ذرة... وبعدين أنت متعرفشي العمل بتاعك ده قد يكون صغيرا ولكن بسبب نيتك الخالصة ربنا يعطيك به ثوابا كبييييرا .. صحيح..كويس أني افتكرت.. شرط مهم جدا في النية أنها تكون خالصة... يعني متجيش مثلا تقول أنا هأصلي علشان ربنا أمرني بالصلاة وأنت في قلبك بتصلي علشان مثلا أصحابك يقولوا ده بيصلي... لازم نيتك اللي هتستحضرها في أعمالك تكون نية خالصة لوجه الله تعالي...وبعدين أنت عارف ، أي نية هتكون مش خالصة مش هتنفعك...يعني أنت هتستفيد إيه مثلا لما حد يقول عنك حاجة كويسة..مش هتفرق معاك ، أهم حاجة أن ربنا يكون راضيا عنك...مش ده هدفنا ولا إيه ؟؟ حلو أوي.. علشان ما أطولش عليك بقي نشوف موضوع الهمة العالية... ولا بص...نخللي دي الحلقة الجاية ؟؟ ماشي يا حبيبي في الله... كفاية كده المرة دي... أوعي تنسي.. يبقي احنا المرة دي اتكلمنا عن الهدف بتاعنا...الهدف العام البعيد والأهداف القريبة...وأنها لازم تكون أهداف محددة ومتناسبة مع هدفنا الأصلي .. واتكلمنا عن النية الخالصة..أننا لازم نستحضر نية صالحة في كل عمل نعمله مهما صغر..ونجدد نيتنا علي طول..وتكون نية خالصة لوجه الله تعالي وعرفنا أن النية والهدف بيكملوا بعضهم.. إن شاء الله بقي الكام يوم دول لغاية الحلقة الجاية عايزك تأخد واجب أنك تكتب في ورقة كده إيه هو هدفك العام الأصلي...اللي هو رضا الله تعالي والفوز بجنته... وحط ليك شوية أهداف قريبة تسعي لتنفيذها خلال الأسبوع الجاي مثلا..أو حتي علي مدار الصيف..شوف حسب ما يناسبك.. تاني واجب أن اللحظة دي هتكون نقطة تحول فعلية في حياتك...هننسي كل أهدافنا ونوايانا التعبانة...ونضع أمامنا الهدف الرئيسي بتاعنا.. ثالثا يا أخي أنك من هنا ورايح كل عمل هتعمله قبل ما تبدأ فيه هتستحضر نية صالحة وخالصة علشان ربنا يجعل العمل ده في ميزان حسناتك...وهتشيل من دماغك أي شوائب لنيتك دي ومش هتحتفظ إلا بالنية اللي ترضي الله تعالي.. وكمان تحاول تستحضر أكثر من نية علشان تأخد ثواب أكبر بإذن الله... ماشي يا أخي الحبيب ؟؟ والله يا أخي أنا أحبك في الله... يللا خللي بالك أنا هأسأل علي الواجب المرة الجاية.. ربنا يحفظك يا أخي...

جزاك الله خيراً على مرورك ^_^

السلام عليكم ورحمة الله وبركاته حلقات شباب الصحوة.. الحلقة الأولي التوبة لماذا التوبة ؟؟ دلوقتي احنا عايزين نرتقي بأنفسنا..تمام ؟؟ طيب أنت قلبك ده إناء...هتصب فيه العلوم وهترتقي به عن طريق العبادات...تمام ؟؟ قبل ما نصب حاجة في الإناء..لازم يكون الإناء إيه ؟؟ نظيفا ! يعني لازم ننظف الإناء علشان لما يبقي التربة الصالحة اللي هنستخدمها طول رحلتنا إن شاء الله تمام ؟ لو بننظف الإناء بالليفة والصابون السائل ((بريل مثلا))...قلبنا هننظفه بالتوبة... هننظف قلبنا بالتوبة إلي الله جل وعلا.. وحاجة كمان... احنا عايزين نشتغل علي منهج تزكية...واحنا عارفين إن الإيمان يزيد بالطاعة وينقص بالمعصية.. مش هينفع نزود إيماننا بالطاعات والنوافل والسنن واحنا أصلا عندنا فروض لم نؤدها ومعاصي نرتكبها !! صح ولا لأ ؟ يبقي لازم قبل ما نبدأ في الارتقاء إن شاء الله نتوب عن المعاصي اللي عندنا...ونتوب عن الفروض اللي أضعناها من قبل.. هنتوب إزاي ؟؟ شروط التوبة اللي عارفينها كلنا.. منها: الأول : الإقلاع عن الذنب فوراً . الثاني : الندم على ما فات . الثالث : العزم على عدم العودة . الرابع : إرجاع حقوق من ظلمهم ، أو طلب البراءة منهم . حلو أوي.. يبقي لازم نسعي لتحقيق هذه الشروط الأربعة...علشان ربنا يتقبل توبتنا بإذنه وفضله... فيه كمان شوية موانع ممكن تحول بين العبد وبين التوبة...((علي فكرة من كتاب كيف أتوب لشيخنا محمد حسين يعقوب)) بس مش هنقولها كلها.. أولا: الجهل بالله... لأن كل ما يعظم قدر الله عز وجل في قلبك تصغر نفسك .. ثانيا: البدعة العمل الصالح عامة بيكون له شرطان : الإخلاص والمتابعة الإخلاص يعني نيتك تكون خالصة لله تعالي...مش بتعمل كده علشان حاجة تانية..مش نيتك ترائي الناس...مش نيتك سمعة ولا منصب ولا شهرة ولا حاجة إلا وجه الله تعالي... والمتابعة يعني تقتدي في كل أعمالك برسولنا الكريم محمد صلي الله عليه وسلم...مش بنألف من عندنا يعني...خوفا من الابتداع ((كل خير في اتباع من سلف وكل شر في ابتداع من خلف)) ثالثا: الكبائر الباطنة: يعني أمراض القلوب اللي بتبقي جوانا واحنا مش واخدين بالنا... لأن احنا مش بتأخد بالنا غير من المعاصي اللي بنعملها بجوارحنا...مع أمراض القلوب دي من أخطر الأشياء زي مثلا أن الواحد يكون عنده كبر..أو عجب بالنفس...أو رياء للآخرين...أو خيلاء...أو حسد...أو غرور...إلخ.. رابعا: الكبائر الظاهرة : ومش لازم يكون الحائل بين العبد والتوبة هو فقط الكبائر المعروفة ((القتل والزنا والخمر و و..)) لأن كما يقال: لا صغيرة مع الإصرار ولا كبيرة مع الاستغفار فإياك أخي الحبيب والإصرار علي ذنب ولو كان عندك صغيرا.. ولا تنظر إلي صغر المعصية ولكن انظر إلي ؟؟ انظر إلي عظمة من عصيت.. خامسا: التوسع في المباحات: يعني تكون الحاجة مباحة ، لكن بنسرف فيها فتطغي علي حاجات أهم وأولي لدرجة أنها تطغي علي الفرائض زي اللي بينام كتير..يقع منه قيام الليل..وشوية شوية ينام عن صلاة الفجر... دي بعض وليس كل الحوائل اللي تحول بيننا والعياذ بالله وبين التوبة... فيه كمان حاجات نحتاجها علشان ربنا يرزقنا التوبة النصوح.. إيه هي الحاجات دي ؟؟ نحتاج للاستعانة بالله... القصة الشهيرة..إذا كنت ماشيا في طريق...ولقيت كلاب بتنبح عليك...بتهوهو يعني..تعمل لها إيه ؟؟ هتهشها هتمشي وتيجي تاني تنبجح عليك...هتهشها تاني.. طب ليه كل ده ! من الأول: استعن بالراعي يكفيك كلابه...الراعي صاحب الكلاب هو أقدر أنه يمنع كلابه عنك..صح؟ ولله المثل الأعلي أنت مش هتقدر تدفع الشيطان لوحدك..لازم تستعين بالله... كل ما تلاقي الشيطان يوسوس لك بمعصية استعذ بالله علي طول منه...بس بصدق مش مجرد كلمة وخلاص تأدية واجب.. نحتاج لمحاربة الهوي والنفس والدنيا والشيطان... نحارب الهوي بمخالفته...خالف هوي نفسك حتي لا يهلكك ! نحارب النفس بقوة الإخلاص...أخلص نيتك لله واقتل نفسك الأمارة بالسوء ! نحارب الدنيا بالزهد فيها...اجعل همك الآخرة تأتيك الدنيا ذليلة ! نحارب الشيطان بالاستعانة بالله...إياك والركون لنفسك فأنت ضعيف ! نحتاج للتعب...لازم نتعب.. أصل مش معقولة يا شباب نقعد نتعب نتعب في الدنيا ولا نتعب أبدا من أجل الله تعالي !! احنا هدفنا إيه أصلا ؟؟ مش الجنة ؟؟ أيوة طبعا !! أمال ليه دائما في نواحي الدين نبقي نايمين ؟!..ليه همتنا عالية في كل حاجة إلا دي !! خالف نفسك حتي تفوز برضا الله.. تعالوا يا شباب نبدأ عهدا جديدا.. تعالوا نبدأ من اللحظة دي بأسلوب مختلف.. تعالوا نخللي الإجازة دي مختلفة... تعالوا نركن الدنيا علي جنب ونشتغل شوية لآخرتنا... يللا يا شباب.. هنبدأ بالتوبة.. واجبنا المرة دي هو التوبة...هنتوب عن كل المعاصي اللي عندنا مجملا... ولو فيه ذنب معين لازق فينا مش عارفين نتخلص منه المرة دي هنتوب منه بجد.. وهنقف بين يدي الله تعالي في الثلث الأخير ونتضرع ونبكي ونشكو حالنا لمن هو أعلم بنا سبحانه... إن شاء الله من اليوم وعلي مدار الكام يوم الجايين دول هنطبق كل الكلام اللي كتبناه هنا..ماشي ؟؟ اتفقنا ؟؟ وهنخلع الحجب اللي بيننا وبين التوبة ونحرقها عن آخرها... يعني هنوقد همتنا... ونهتم بآخرتنا.. وبإذن الله هنبدأ علي نضيف.. .. ومش هننسي هدفنا يا شباب... إنهـــــــــــــــــا جــــــــــــــــنة !!!

الموقع رائع جزاك الله خيراُ

هو طبعاً مش هيبقى راضى عننا بس انا شايف ان فيه ناس بتتحسن و بتتجه للدين يعنى برضه ممكن يبقى راضى عن بعض الناس...بس دول قليلين أوى ربنا يستر.

جزاكم الله خيراً و نفعنا الله بما علمنا بس كان عندى اضافة..ممكن؟ يظن بعض الناس انه بعد ان يصلى صلاة الاستخارة فانه بعد ان ينام سيرى مناماً به ما سيقوم بعمله و هذا اعتقاد خاطئ و لكن بعد الاستخارة فان الله يهدى المسلم باذنه الى الصواب...من غير مايشوف احلام يعنى :D و جزاكم الله خيراً

جزاك الله خيراً أكتر موقف أثر فيا موقف الخليفة المأمون ربنا يكرمك يا dOo2 El2mr

السلام عليكم ورحمة الله وبركاته بفضل الله وحده... لا إله إلا هو سبحانه... يسر أخوتكم بالقسم الدعوي.. هذا لك ! أن يقدموا لكم: حلقات شباب الصحوة..لصيف 2006 نسأل الله أن ينفعنا بها وتكون خطوات صحيحة علي الطريق القويم... والله المستعان طيب أولا إيه هي حلقات شباب الصحوة ؟؟ هي خطوات ممنهجة - يعني منهج يعني :D - نسعي فيها إلي تزكية نفوسنا بإذن الملك تعالي يعني إن شاء الله نسعي لرفع مستوانا الإيماني... هنبدأ إن شاء الله بالتحدث عن نقط مهمة جدا... أولا عن التوبة ثانيا عن النية الخالصة والهدف المحدد والهمة العالية ثالثا أمور مهمة قبل المنهج خامسا المنهج ثم نستمر إن شاء الله في التحدث معا عن العبادات التي سنلتزم بها إن شاء الله تعالي طيب جميل جدا..الحمد لله إن شاء الله نبدأ أول حلقة المشاركة القادمة... تابعونا ... ((أتمني يا شباب تنشروها في المنتديات اللي تعرفونها علشان آخد ثـ..قصدي علشان نفيد كل الشباب ))

جزانا واياكم شكراً على مرورك الكريم

موضوع هايل جزاك الله خيراً

جزاك الله خيراً موضوع حضرتك فكرنى بموقف كنت قريته عن الرسول صلى الله عليه و سلم...كان السرير اللى بينام عليه عبارة عن مرتبة طبقة واحدة "من الصوف تقريباً على ما أتذكر " و فـ يوم السيدة عائشة رضى الله عنها عملت المرتبة طبقتين فوق بعض... فالرسول صلى الله عليه و سلم يومها نام و ماصحيش الا على صوت بلال يؤذن للفجر... فقال الرسول صلى الله عليه و سلم للسيدة عائشة - فيما معناه - انه الليلة ضاعت عليه صلاة الليل وقالها " مالى وللدنيا " ... يعنى انا مالى و مال الدنيا..او يعنى انا مكانى مش الدنيا...صلى الله عليه و سلم.

بسم الله الرحمن الرحيم القسم الدعوي هذا لك ! "يوووووووووه...تاني عن الحجاب ؟؟!" ماشية عادي...سمعت..."بست....بست..." التفتت ناحية الصوت...لقت واحدة صاحبتها...استغربت وراحت ناحيتها... صاحبتها سلمت عليها وحطت حاجة في إيدها.... بصت في إيدها..إيه ده...شريط كاسيت.....واسمه ؟؟ "الحجاب"... "يوووووووووووووووووه !! تاني عن الحجاب !! طب ما أنا متحجبة !!!!! " -------------- يا تري هل هي فعلا متحجبة ؟؟ احنا منقدرشي نقول لأ..فعلا فيه حاجة ملفوفة حوالين شعرها...بس للأسف صعب تحكم عليه أنه "حجاب"... هي لابساه حوالين شعرها ...بس ده حجاب ؟؟ كلمة "حجاب" أصلا يعني بيحجب...بيمنع يعني بيغطي...وده مش متوافر في اللي هي لابساه... طب تعالي نفكر كده ونشوف...إيه هو الهدف من الحجاب ؟؟ إيه لازمته ؟؟ المفروض أنه يحمي البنت المسلمة ويعفها ويمنع عنها ذئاب البشر....وكمان علشان نحمي شباب المسلمين من فتنة النساء...الشباب اللي عينيهم باظت من كتر النظر للنساء... "طب ما الشباب اللي مش بيغضوا بصرهم هم اللي غلطانين ! " أيوة معاكي حق...فعلا الشباب اللي بيلقوا بصرهم علي البنات هم غلطانين أنهم مش بيغضوا بصرهم..صح..بس برضه البنت دي مشتركة في الخطأ.. "إزاي ما هي متحجبة ؟!" ..أقول لك هل حجابها ده فعلا منع الشباب من أنهم يتفتنوا؟؟ طب ده فيه أنواع من الحجاب دلوقتي بقت هي أصلا مدعاة للفتنة وإثارة الشهوة !! تخيلي يا أختي !! المفروض الحجاب يخفي جمالك عن العيون ...صح ؟ طب هل حتة القماش الرقيقة الصغيرة الملونة الملفوفة حوالين شعرك دي هي اللي أخفت جمالك فعلا ومنعت الفتنة ؟؟ لأ ! وده مش رأيي الشخصي ده رأي الشباب الأولاد نفسهم ! هل البارفان الجميل اللي أنت واضعاه ده بيمنع الفتنة ؟؟ ولا بيزودها ؟؟؟ طب البارفان ده ليه ؟؟ مش هو زينة ؟؟ والمفروض زينتك متظهرشي غير لزوجك ..صح ؟؟ وبعدين الحديث واضح في النقطة دي .. قال رسول الله صلي الله عليه وسلم: ((أيما امرأة استعطرت فمرت على قوم ليجدوا من ريحها فهي زانية )) حديث حسن ربنا يحفظك يا أختي,,,.. هل البودي والبنطلون الضيق جدا والجيبة القصيرة أو الضيقة والمفتوحة كل دول بيمنعوا الفتنة ولا بيزودوها ؟؟ هل المناكير والزينة دي كلها بتمنع الفتنة ؟؟؟ بالله عليكي يا أختي فكري مع نفسك ...مش معقولة نضحك علي نفسنا أننا عاملين الصح.. احنا عايزين الجنة يا أختي مش الدنيا...مش مشكلة لما نتعب الكام سنة بتوع الدنيا دول علشان نوصل للجنة برحمة الله وربنا يرزقنا الخلووووووود فيها... "بس أنا لازم يبقي مظهري حلو برضه ..مش هأمشي لابسة مقطع يعني ! " بالضبط يا أختي ! احنا مش بنقول أنك تلبسي مقطع وقديم...لكن عايزين مظهر محترم فعلا وفي نفس الوقت لا يخالف الزي الشرعي... يعني مثلا مينفعشي حجاب مع زينة... سواء كانت الزينة دي في اللبس أو في العطر أو الحجاب نفسه ....ده يتعارض مع ده... وبعدين احنا عمالين نستورد موضات من الغرب...لأ وكمان بقوا يعملوا موضات للمحجبات...مقطع وملون و ضيق...تحت اسم "الموضة"...وللأسف بناتنا المسلمات بينجروا وراء هذه الضلالات والعياذ بالله... حتي الحجاب حولوه أعداؤنا لفتنة !!! ده كمان فيه مشكلة تانية...البنات اللي بيلبسوا الحاجات دي وفاكرين أنهم كده لبسوا الحجاب الشرعي وبقوا أحسن ناس...كده كل ما يقابلوا كتيب أو شريط أو حتي حد يتكلم عن الحجاب مش بيهتموا...بيعتبروه متوجه لحد غيرهم للي مش متحجبين أصلا... وبعدين أنت أحسن من غيرك ولازم تكوني متميزة عنهم.. "يعني أقلعه أحسن يعني ولا إيه ؟؟" لأ لأ طبعا... احنا مش بنقول أن أنت متساوية مع اللي مش متحجبين خالص...إطلاقا...بس احنا عايزين نفس الحجاب اللي الإسلام أمر بيه...عايزين حجاب الصحابيات وأمهات المؤمنين....مش عايزين حجاب اليومين دول... أنت عايزة تدخلي الجنة مع أمهات المؤمنين...صح ؟؟ يبقي اعملي زيهم !! البسي زيهم !!...يللا يا أختي... علشان كده كل شوية بنتكلم عن الحجاب...حتي تلاقي أخوات ملتزمات يستغربوا ليه معظم الكلام الموجه للفتيات بيكون عن الحجاب ؟؟!! والسبب أن النقطة دي مهمة جدا وللأسف واقعة عند بنات كتير...فاهمنيها غلط... "أنا ناوية والله...بس الحر..واحنا في الصيف والدنيا حر أوي !" لا يا أختي ...ده مش مانع إطلاقا..بالعكس دي الشمس دي المفروض تكون تذكرة لينا بحر نار جهنم والعياذ بالله...وهي أقل منها بكثير ! وكمان يقول الله تعالى: {قُلْ نَارُ جَهَنَّمَ أَشَدُّ حَرّاً لَوْ كَانُوا يَفْقَهُونَ} [التوبة:81] وبعدين بإذن الله لما تلبسي الحجاب الصحيح علشان ترضي ربنا والله يا أختي هتلاقي في قلبك لذة وحلاوة تفوق الوصف....وهتشعري فعلا بأنك طايرة في السماء مش ماشية علي الأرض..هتنسي كل الحر وكل التعب ده كله ! لما تستحضري أنك مع توبتك دي ولبسك للحجاب الصحيح ربنا سبحانه وتعالي يبدل سيئاتك حسناااات...علشان تدخلي الجنة برحمة الله.. ياااااااااه يا أختي.. أنت هتتركي كل اللبس اللي عندك ده...مع أنه جديد ..مع أنه جميل...مع أنه غالي...مع أنك بتحبيه...بس حبك لربنا أكبر من حبك لشوية هدوم..أيوة والله...هتتركي كل الهدوم دي فقط لوجه الله.. يا رب أنا تركت كل ده وجئت إليك تائبة... تأكدي يا أختي أن من ترك شيئا لله عوضه الله خيرا منه... "طيب أنا خايفة ألبس الحجاب الصحيح فما أقدرش عليه وأقلعه تاني" ربنا يثبتك ..مش هتقلعيه تاني إن شاء الله..لو صدقتي في نيتك أنك عايزة تتحجبي صح لوجه الله فعلا مش هتقلعيه تاني إن شاء الله.. وبعدين ما كده ممكن الشيطان يضحك علي أي واحد في أي عبادة ويجعله يتركها لنفس الحجة ! الصلاة والصيام وكل العبادات...مش كده ولا إيه ؟ "طب هل ممكن أستني لغاية ما أتجوز بعد كده أتحجب..أصل ممكن أتحجب دلوقتي فمحدش يرضي يتجوزني " إطلاقا !! بالعكس ده كل الشباب اللي فعلا مهتمين بالزواج كعفة للنفس ولتنشئة جيل صحيح بيختاروا البنت الملتزمة في لبسها وأخلاقها... حتي الشباب الضائع اللي بيمشي مع بنات..لما ييجي يتجوز بيكون عايز واحدة مفيش حد غيره شافها قبل كده..تكون له وحده.. إنما اللي بيختار المتبرجة دي فهو أصلا لا يغار علي حرمات الله ولا يخاف عليك من النار...بالعكس ده كمان ممكن يمنعك من الحجاب بعد الزواج ! يعني يا أختي شوفي أي شاب بيصاحب بنات...هتلاقيه بيصاحب البنت مجرد إرضاء لغرور نفسه..علشان يحس أنه ولد زي باقي الولاد...وبيدور علي البنت الجميلة يصاحبها علشان يستمتع بصحبتها المحرمة.. بينما لو عنده أخت بنت عمره ما يرضي أبدا أنها تصاحب أولاد أو تهزر معاهم...يعني بيخاف علي أخته أكتر من صاحبته..بقي ده واحد يستحق أنك تتجوزيه فضلا عن أنك تصاحبيه أصلا !! "أنا فاهمة فعلا ومقتنعة...لكن الله يهدي من يشاء...وأنا هأتحجب صح لما ربنا يشاء أنه يهديني" لا يا أختي...الموضوع مش بالطريقة دي.. طبعا الله يهدي من يشاء...لكن احنا علينا الاستعانة بالله والتوكل عليه...وكمان علينا الأخذ بالأسباب.. يعني ماينفعش أنك تفضلي منتظرة..لازم تبدأي بنفسك.. (إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ ) (الرعد من الآية 11) لازم تبدأي بتغيير نفسك... مع الاستعانة بالله ...ودعائه أنه يقدرك علي لبس الحجاب الصحيح...ومصاحبة الأخوات الملتزمات علشان يساعدوكي.. أنت يا أختي لازم تتأكدي أن أنا عايز مصلحتك...أنا عارف أن لهجتي ممكن تكون تقيلة شوية...أرجو متزعليش مني...بس المشكلة أن الموضوع زاد عن حده أوي...أصل ده مش مجرد خطأ بتعمليه..لأ ده إثم كل مرة تلبسي اللبس ده تأخذي ذنب...وذنب للشباب اللي ممكن يتفتنوا بسبب اللبس ده...تخيلي لو جئتي بصلاة وصيام...وزكاة وقيام...لكنك فتنتي وفتنتي..في الكلية وفي الشارع وفي المواصلات...كل مرة وكل خروجة....كل دول !...أنا خايف يا أختي ينالك من ذنوبهم ... واحنا مش ناقصين ذنوب كفاية اللي فينا... بالله عليك راجعي نفسك ..مفيش وقت للتأجيل ...مفيش وقت للتردد..أصل ده أمر ديننا...منقدرشي نقول لأ...مفيش بديل علشان ندور عليه.... مش موضوع حرية شخصية زي ما البعض بيدعي نسأل الله العافية... "يعني كده إيه الحل ؟ أعمل إيه ؟ " رائع يا أختي..هو ده الكلام... أنا دلوقتي هأعرض عليك باختصار الشروط اللي المفروض تكون متوفرة في الحجاب بتاعك علشان يبقي حجاب تمام وصحيح بإذن الله.. هتراجعيها نقطة نقطة...خليها وقفة صدق مع نفسك.... قبل ما تبدأي لازم تفتكري أن احنا جايين الدنيا دي لهدف عبادة الله سبحانه...قال تعالي: ((وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ))[الذاريات : 56],,,دائما ضعي هدفك قدامك...هدفك الجنة...أنت طلبك الجنة... أوعي تعدي الكلام عليكي زي كل مرة .. 1) هل حجابك يستر كل بدنك ؟؟ ولا بيظهر شوية شعر من قدام أو يبين جزء من رقبتك ؟؟ أوعي تلبسي مع الحجاب لبس ضيق أوي...عايزين اللبس الفضفاض الواسع ولا بيوصف ولا بيشف.. 2) أختي...هل حجابك زينة في حد ذاته ؟ ..لو كده يبقي غلط لأن الحجاب المفروض يستر زينتك مش يبقي هو أصلا زينة ملون ومنظره ملفت للانتباه... 3) هل حجابك تقيل مش بيشف؟...أوعي يظهر اللي تحته يا أختي... 4) هل حجابك واسع مش ضيق ؟...لازم ميكونشي بيوصف جسمك.. 5) أختي هل حجابك متعطر ؟؟ لو بتحطي عطر من اللحظة دي توبي إلي الله واستغفريه وماتعمليش كده تاني...لسه قايلين الحديث من شوية... 6) هل حجابك يشبه ملابس الرجال ؟ مينفعشي برضه علشان الامر فيه لعن والعياذ بالله... 7) هل حجابك يشبه ملابس الكافرات ؟ يعني لبس زي بتوع غير المسلمين...لازم حجابنا يشبه الحجاب الإسلامي الصحيح مش زي الكافرات والعياذ بالله.. 8) أختي هل حجابك تقصدين به الشهرة بين الناس ؟ لا يا أختي أصلحي نيتك...لن ينفعك إلا الله..ابتغي بحجابك مرضاته سبحانه... ثمانية شروط يا أختي أوعي تخالفي منها أي شرط... يللا بقي علشان لما تحققيهم إن شاء الله تدعي صاحبتك اللي متعرفشي علشان تبقي زيك...وتأخذي ثوابها .. يللا بقي يا أختي اشتقنا لجيل التمكين.... يللا عايزين جيل صحوي حقيقي... أختي انت لك دور كبير جدا في نصر أمتنا..أيوة والله.. المجتمع مش قاصر علي الرجال فقط..ولا دلوقتي ولا في عهد الصحابة رضوان الله عليهم... بالعكس ده الصحابيات كان لهم أدوارا جليلة في عزة الإسلام ونصرته.. وأنت أصلا ماشية علي أثرهم... احنا للأسف نفتقد صلاح الدين...نفتقد خالد بن الوليد...نفتقد القعقاع والمثني... وأنت يا أختي اللي هتربي جيل صلاح الدين...أنت اللي هترجعي عهد خالد بن الوليد..أنت اللي هتطلقي أحفاد القعقاع والمثني ...أنت يا أختي وبإذن الله ! فلازم تكوني قدوة حسنة لكل بنات المسلمات..ولأولادك كمان... أيوة أنت يا اللي بتقرأي دلوقتي...صدقيني...مهما كان مستواك...هتقدري تحسنيه إن شاء الله..وتأتي بالنصر لأمتنا... بس أنت أخلصي النية لله تعالي وابدأي يا أختي لا تنامي.. ابدأي من اللحظة دي... ما تأجليش الموضوع... خدي قرارك دلوقتي... وعاهدي ربنا سبحانه وتعالي أنك هتطيعي أمره وتنفذيه وأنت راضية.. قوليها دلوقتي يا أختي ! خلليها لحظة تغيير.. وقفة صدق.. من النهاردة هأبدأ عهد جديد بإذن الله.. هأنسي اللي فات..وأبدأ من الأول... أنا تبت إليك يا ربي...فتقبلني.. من النهاردة بإذن الله هألبس الحجاب الصحيح... من النهاردة مش هأفتن الشباب.. من النهاردة مش هأغضب ربنا من لبسي... وهأبص لقدام....للجنة... الجنة يا أختي الجنـــــــــــــــــــــة !!! يللا واحنا كلنا هندعي معاكي... وقولي آمين.... الحمد لله رب العالمين والصلاة والسلام علي رسوله صلي الله عليه وسلم اللهم ارزق كل بنات المسلمين الحجاب الصحيح اللهم أكرم كل بنات المسلمين اللهم اجعل لمن قررت من الآن أن ترتدي الحجاب الصحيح فاجعل لها نصيبا من نصر أمة الإسلام يا رب.. اللهم من قررت من الآن أن تترك المعاصي وتبتعد عن الأهواء..وقررت أن تسلك الطريق المستقيم...اللهم تقبل منها يا ربنا وثبتها علي الحق... اللهم ارحمها واغفر لها وارزقها الفردوس الأعلي.... اللهم يسر لها الطريق...اللهم أرها الحق حقا وارزقها اتباعه...وأرها الباطل باطلا وارزقها اجتنابه اللهم وفق كل من قررت من اللحظة أن تقتدي بأمهات المؤمنين و ارزقها الصبر.. اللهم ارزقها لذة النظر إلي وجهك الكريم في غير ضراء مضرة ولا فتنة مضلة.. آمين آمين والحمد لله رب العالمين وصلي الله وسلم وبارك علي نبينا محمد وعلي آله وصحبه أجمعين ولو عايزة تسمعي أكتر عن الحجاب وتعرفي قصص من أخواتك اللي ربنا هداهم ولبسوا الحجاب ممكن تنزلي الشريط ده باسم "أختاه وقفة مع النفس" بتاع الشيخ محمود المصري.. اتفضلي من هنا: كليك يمين و save target as http://media.islamway.com/lessons/masry//347-wakfah.rm أو اسمعيها علي طول من هنا: http://www.islamway.com/?iw_s=Lesson&iw_a=...lesson_id=31178 ويا سلام بقي لو تسمعي النشيد الجميل ده: http://media.islamway.com/several/245/05.mp3

قصة رائعة جزاك الله خيراً اللهم اهدنى و اهد كل شباب المسلمين

آمين يا رب جزاك الله خيراً

جزاك الله خيراً ولكن احب ان انبه على خطأ املائى و الصواب: جزاك الله خيراً